«ԱՊԱԳԱ ՀԱՅԿԱԿԱՆԸ» հանրային նախաձեռնություն է՝ մեկնարկած հայերի և ամբողջ աշխարհից Հայաստանի բարեկամների կողմից: Մեծ անորոշության և հրատապ մարտահրավերների այս ժամանակներում նախաձեռնությունը ջանում է խթանել մի երկխոսություն, որը կհանգեցնի փոխըմբռնման և Հայաստանի ու հայության ապագա տեսլականի: Հաշվի առնելով գոյատևման և վերածննդի մեր դարավոր պատմությունը՝ մենք հավաքական պատասխանատվություն ենք կրում մեր ազգի ապագան և այն ուղին կանխորոշելու գործում, որը մեզ հաջողությամբ կառաջնորդի դեպի այդ ապագան:
Մենք ձգտում ենք՝
Հաղթահարել հայության բևեռացումը. Նախաձեռնությունը ձևավորում է մի հարթակ, որի միջոցով անկախ քաղաքական հայացքներից ու սոցիալ-տնտեսական վիճակից, ամբողջ հայությունը կարող է միասին քննարկել մեր ընդհանուր ապագան:
Վերացնել հուսահատության մթնոլորտը. Ապագայի հանդեպ հավատը վերականգնելու, տեսլականի մշակման ու ծրագրերը իրականություն դարձնելու համար անհրաժեշտ է հաղթահարել հուսահատությունն ու միասին գնալ առաջ՝ հաշվի առնելով անցյալի դասերը:
Ձևակերպել համակարգային լուծումներ. Ներկայի խնդիրները դժվարացնում են ապագայի վրա կենտրոնանալը, բայց մենք պետք է ստեղծենք ազգային արժեքների վրա հիմնված համակարգեր՝ միասին ձևավորելով վաղվա օրվա ամուր հիմքերը:
Վերակտիվացնել հասարակությունը. Հայաստանի և հայության ապագան հնարավոր է կառուցել միայն յուրաքանչյուրիս ակտիվ մասնակցությամբ: Նախաձեռնությունը ձգտում է ակտիվացնել հասարակության բոլոր խմբերին, որպեսզի յուրաքանչյուր հայ զգա իրեն փոփոխությունների մասնիկ:
Օգնել մարդկանց պատասխանատվություն ստանձնել երկրի ու ապագայի հանդեպ. Մենք հավաքական պատասխանատվություն ենք կրում մեր ազգի ապագան կանխորոշելու, դրան հասնելու ուղիները մշակելու հարցում: Մարտահրավերները հրատապ են, պետք է գործել հիմա ու միասին:
2021թ. մայիսից «ԱՊԱԳԱ ՀԱՅԿԱԿԱՆԸ» նախաձեռնությանը 100-ից ավելի երկրներից միացել է ավելի քան 110 հազար մարդ: Միջազգային ու տեղական կազմակերպությունների ու փորձագետների աջակցությամբ նախաձեռնությունը սահմանել է 15 նպատակներ, որոնք ամփոփում են մեր առջև ծառացած մարտահրավերների ամբողջական շրջանակը: Նախաձեռնության կազմակերպած քննարկումների երկու հիմնական ձևաչափերն են համաժողովներն ու ֆորումները: Նախաձեռնության մեկնարկից ի վեր տեղի են ունեցել փորձագիտական 140-ից ավելի առցանց և առկա հանդիպումներ:
«ԱՊԱԳԱ ՀԱՅԿԱԿԱՆԸ» նախաձեռնությունը ապագային ուղղված ծրագրերի իրականացման համար կարևորում է հայության և նրա բարեկամների ջանքերի մեկտեղումը, ծրագրերի համադրումը, ռեսուրսների վատնումից ու փոշիացումից խուսափելը, հետևաբար այն բաց է համագործակցության համար շահագրգիռ բոլոր կողմերի հետ:
«ԱՊԱԳԱ ՀԱՅԿԱԿԱՆԸ» նախաձեռնությունը համակարգվում է ԱՊԱԳԱ ՀԱՅԿԱԿԱՆԸ զարգացման հիմնադրամի կողմից, որի հիմնադիրներն են Ռիչարդ Ազարնիան, Արթուր Ալավերդյանը, Նուբար Աֆեյանը, Ռուբեն Վարդանյանը։ Հիմնադրամի նպատակներն են աջակցել Հայաստանի և հայության ապագան հավաքականորեն ապահովելուն ուղղված նախաձեռնություններին, ներգրավել անհատների ու կազմակերպությունների Հայաստանից, Արցախից և Սփյուռքից, նպաստել հայ ժողովրդի հոգևոր և պատմական ժառանգության և ինքնության պահպանմանը, ժամանակակից իրողություններում նրա վերածնման համար պայմանների ստեղծմանը:
