Այսօր Ապագա Հայկականի Համաժողովի քննարկումների երկրորդ օրն էր՝ նվիրված «Հայաստան-Սփյուռք միասնականություն» նպատակին: Մասնակիցները օրը սկսել են «Եռաբլուր» զինվորական պանթեոն-հուշահամալիր այցով՝ հարգանքի տուրք մատուցելու Հայրենիքի համար նահատակված հայորդիների հիշատակին:
Նախքան Համաժողովի քննարկումներին անցնելը, Հաշվիչ/վերահսկիչ հանձնախմբի նախագահ Արիկ Գէորգեանը ներկայացրեց նախորդ օրվա քվեարկությունների արդյունքները: Նշենք, որ Հաշվիչ/վերահսկիչ հանձնախումբը ձևավորվել է մասնակիցների ինքնաառաջադրման սկզբունքով, և այնուհետև արդեն հանձնախմբի անդամները առաջադրել և ընտրել են նախագահին:
Համաժողովը շարունակվել է փորձագիտական հանձնախմբի ղեկավար, հրապարակախոս, «Առավոտ» թերթի գլխավոր խմբագիր Արամ Աբրահամյանի ելույթով, որը անդրադարձել է վերջին 5 ամիսների ընթացքում փորձագետների կատարած աշխատանքներին ու քննարկմանը դրված փաստաթղթերին:
Ինչպես և առաջին օրը, մասնակիցները ծանոթացել են փորձագետների կողմից մշակված սցենարներին և ծրագրերին, քննարկել, նաև ներկայացրել իրենց առաջարկությունները, ապա քվեարկել իրենց կողմից հավանության արժանացած մոտեցումների և ծրագրերի օգտին:
Հիշեցնենք՝ առաջին համահայկական քաղաքացիական Համաժողովը կազմակերպում է «ԱՊԱԳԱ ՀԱՅԿԱԿԱՆԸ» հանրային նախաձեռնությունը, որի հիմնադիրներն են Նուբար Աֆեյանը, Ռուբեն Վարդանյանը, Ռիչարդ Ազարնիան, Արթուր Ալավերդյանը և այլոք:
Լուսանկարներ
Տեսանյութեր
