Հաճախ տրվող հարցեր

«ԱՊԱԳԱ ՀԱՅԿԱԿԱՆԸ» հանրային նախաձեռնություն է, որը չունի քաղաքական կամ կուսակցական որևէ պատկանելություն: «ԱՊԱԳԱ ՀԱՅԿԱԿԱՆԸ» նախաձեռնության նպատակը Հայաստանի և աշխարհասփյուռ հայության համատեղ ուժերով ապագային ուղղված ծրագրերի մշակումն ու իրագործումը խթանելն է:

«ԱՊԱԳԱ ՀԱՅԿԱԿԱՆԸ» նախաձեռնությանը կարող է միանալ ազգությամբ կամ ընտրությամբ յուրաքանչյուր չափահաս հայ` առանց որևէ այլ սահմանափակման:

«ԱՊԱԳԱ ՀԱՅԿԱԿԱՆԸ» աշխարհասփյուռ հայության ու Հայաստանի բարեկամների նախաձեռնությունն է, որն ուղղված է Հայաստանի և հայության կայուն զարգացման շուրջ համընդհանուր գիտակցության և փոխըմբռնման ձևավորմանը։

Դառնալով Նախաձեռնող՝ Դուք համաձայնում եք ներգրավվել Հայաստանի և հայության ապագայի 15 նպատակների իրագործմանն ուղղված գործողություններում։ Շարժման նախաձեռնող դառնալու համար որևէ պարտավորություն նախատեսված չէ։

Նախաձեռնությանը կարող եք միանալ www.futurearmenian.com կայքէջում՝ միևնույն ժամանակ խրախուսելով մյուսներին միանալ և ակտիվ մասնակցել կազմակերպվող միջոցառումներին:

Աշխարհասփյուռ հայության առջև ծառացած մարտահրավերները հնարավոր է լուծել միմիայն առկա բոլոր ռեսուրսների միավորմամբ: Մենք կարևորում ենք աշխարհասփյուռ հայության և Հայաստանի բարեկամների ներգրավումը նախաձեռնության 15 նպատակների իրագործման աշխատանքներում՝ ուղղված այդ մարտահրավերների հաղթահարմանը:

«ԱՊԱԳԱ ՀԱՅԿԱԿԱՆԸ» նախաձեռնությունը միտված է ոչ միայն ՀՀ-ի, այլև Արցախի ու աշխարհասփյուռ հայության զարգացմանը: Նախաձեռնության համաժողովները, ֆորումներն ու քննարկումները միշտ բաց են Սփյուռքի ներկայացուցիչների համար: Ավելին՝ Ապագա Հայկականի առաջին համահայկական քաղաքացիական Համաժողովի 200 մասնակիցներից 100-ը եղել են Սփյուռքից:

Հայության ապագան հնարավոր է փրկել միայն հավաքական ուժերով: «ԱՊԱԳԱ ՀԱՅԿԱԿԱՆԸ» նախաձեռնությունը և համահայկական քաղաքացիական առաջին Համաժողովը բոլոր ուժերի մեկտեղման կարևորագույն հարթակ է: Նախաձեռնությունն ամենատարբեր կազմակերպությունների ու անհատների հետ արդեն իսկ իրականացնում է Համագործակցային ցանցի ձևավորման աշխատանքներ՝ Համաժողովին արձանագրված որոշումների իրագործման նպատակով:

Քաղաքացիական ասամբլեան կամ քաղաքացիական ժողովը մասնակցային ժողովրդավարության նոր ձևաչափերից է, թեև դրա առանձին տարրեր կիրառվել են դեռևս Հին Հունաստանում: Այն միտված է հասարակության երկփեղկվածությունն ու բևեռացումը հաղթահարելուն, փակուղային իրավիճակներից ելքեր գտնելուն, երբ քաղաքական ու հասարակական կառույցները գործունակ չեն և դիրքորոշումները ծայրահեղ տարբեր են: Մոդելի կիրառումը հնարավորություն է ընձեռում երկրի համար ճակատագրական իրավիճակներում համախմբել հասարակական ներուժը, կայացնել կենսական նշանակություն ունեցող որոշումներ և անմիջական մասնակցություն ունենալ դրանց իրագործմանը:

Քաղաքացիական ասամբլեան հնարավորություն է ընձեռում հասարակության ամենատարբեր շերտերի ներկայացուցիչներին դարձնել իրենց ձայնն առավել լսելի պետական որոշումների կայացման գործընթացում, պետական գործիչներին, քաղաքական կուսակցություններին ու հանրային տարբեր շարժումներին էլ՝ առանցքային հարցերի վերաբերյալ ստանալ քաղաքացիների անմիջական կարծիքն ու մեկնաբանությունը: Այն թույլ է տալիս գտնել հնարավոր լուծումներ փակուղային իրավիճակներում, երբ հասարակության ավանդական ինստիտուտներն ի զորու չեն անել դա:

Քաղաքացիական ասամբլեայի մոդելը հաջողությամբ կիրառվել է մի շարք զարգացած երկրներում, այդ թվում՝ Գերմանիայում, Իռլանդիայում, Կանադայում, Մեծ Բրիտանիայում, Ֆրանսիայում, նույնիսկ ԵՄ-ի ու ՄԱԿ-ի մակարդակում:

«Քաղաքացիական ասամբլեա»-ն հասարակության տարբեր շերտերի ու խմբերի ներգրավմամբ օգնում է վերականգնել քաղաքական դաշտի հավասարակշռությունը՝ մեկ հարթակում արդյունավետորեն ամփոփելով ամենատարբեր հայացքների տեր քաղաքացիների գաղափարները։ Մասնակցային ժողովրդավարության այս մոդելը հնարավորություն է տալիս հաղթահարել հասարակության բևեռացումը՝ փորձելով միասնական ուժերով լուծել առկա մարտահրավերները:

Առաջին համահայկական քաղաքացիական Համաժողովը Սփյուռքի ներգրավմամբ աշխարհում առաջին «Քաղաքացիական ասամբլեա»-ն էր: Բացի այդ, մոդելի առանձին բաղադրիչներ ներդրվել են միմիայն տեղայնացումից և մեր պայմաններին ու իրողություններին համապատասխանեցնելուց հետո:

Համաժողովի 200 մասնակիցներից 100-ը եղել են Հայաստանից ու Արցախից, 100-ը՝ Սփյուռքից: Նրանք ընտրվել են վիճակահանությամբ ու ներկայացուցչական ընտրանքի մեթոդով, ինչն ապահովել է հասարակության բոլոր շերտերի ներկայացվածությունը:

Համաժողովի մասնակիցներն ընտրվել են ներկայացուցչական ընտրանքի մեթոդով՝ ապահովելով բնակչության սեռատարիքային, կրթական և բնակության վայրով պայմանավորված համամասնությունը՝ ձևավորելով հայ հասարակության մանրակերտը:

Համաժողովին գրանցվելու հայտ ներկայացրած և էլեկտրոնային հասցեն հաստատած անձինք ստացել են հատուկ կոդ, որի միջոցով էլ մասնակցել են վիճակահանությանը: Անկախ դրա արդյունքներից՝ գրանցված բոլոր քաղաքացիները Համաժողովին առցանց մասնակցելու հնարավորություն են ունեցել՝ օգտվելով առկա փաստաթղթերից և մասնակցելով առցանց քննարկումներին:

Համաժողովի կազմակերպիչներն ապահովել են ոչ երևանաբնակ մասնակիցների տրանսպորտային տեղափոխումն ու կեցությունը։

Համաժողովի քննարկմանն են ներկայացվել նախապես ձևավորված փորձագիտական հանձնախմբերի մշակած սցենարներն ու ծրագրերը: Դրանց վերաբերյալ իրենց կարծիքը արտահայտել են հասարակ մարդիկ՝ տարբեր սեռի, տարիքի, կրթական մակարդակի և համայնքի ներկայացուցիչներ, որպեսզի հնարավոր լինի ապահովել այդ փաստաթղթերի բազմակողմանի քննությունն ու փորձարկումը:

«ԱՊԱԳԱ ՀԱՅԿԱԿԱՆԸ» նախաձեռնության կողմից արդեն իսկ տարվում են Համագործակցային ցանցի ձևավորման աշխատանքներ, որում ներառվելու են շահագրգիռ բոլոր շրջանակները՝ պետական կառույցներից մինչև մասնավոր կազմակերպություններ ու անհատներ: Բացի այդ, մշակված բոլոր փաստաթղթերը հանրային սեփականություն են և դրանք կարող է օգտագործել հետաքրքրված յուրաքանչյուր անձ:

Համաժողովի շրջանակում ընդունված բոլոր առաջարկություններն ու ծրագրերը հանրային սեփականություն են և հասանելի են պետական ու մասնավոր ոլորտի բոլոր ներկայացուցիչներին՝ դրանց հնարավոր տարբերակները մշակելու և իրագործելու համար։