2023թ. մարտի 10-ից 12-ը Երևանում կայացել է Ապագա Հայկականի Համաժողովը՝ «քաղաքացիական ասամբլեա» մասնակցային ժողովրդավարության մոդելի հիման վրա։
Համաժողովն ունեցել է 200 մասնակից Հայաստանի Հանրապետությունից, Արցախից և Սփյուռքից, որոնք ընտրվել են բաց վիճակահանության միջոցով՝ ապահովելով սեռատարիքային, կրթական և բնակության վայրով պայմանավորված համամասնությունը։ Նրանք հնարավորություն են ունեցել համակողմանի քննարկել «ԱՊԱԳԱ ՀԱՅԿԱԿԱՆԸ» նախաձեռնության 15 նպատակներից երեքի՝ «Պատմական պատասխանատվություն», «Հայաստան-Սփյուռք միասնականություն» և «Բնակչության աճ» նպատակները և ընդունել են առաջարկություններ այդ նպատակների կյանքի կոչման ուղղությամբ։
Այս գործընթացում «ԱՊԱԳԱ ՀԱՅԿԱԿԱՆԸ» նախաձեռնությունը հարթակ է հայ ժողովրդի առջև ծառացած խնդիրներին լուծումներ գտնելու, համահայկական գիտելիքները և ներուժը համախմբելու համար։
Համաժողովն ունեցել է երեք փուլ․
Նախապատրաստական փուլում փորձագիտական խմբերի կողմից յուրաքանչյուր թեմայի առնչությամբ մշակվել են զարգացման հնարավոր սցենարներ և դրանց հիման վրա համապատասխան առաջարկություններ փորձագիտական համապարփակ հիմնավորմամբ։
Երկրորդ փուլում բաց վիճակահանությամբ ընտրված 200 մասնակից՝ հայրենիքից և Սփյուռքից, համաժողովի ընթացքում ծանոթացել է փորձագիտական զեկույցներին և ընդունել առաջարկությունների փաթեթներ: Բոլոր նիստերը համակարգել են ոլորտի առաջատար մասնագետները: Համաժողովին գրանցված յուրաքանչյուր ոք հնարավորություն է ունեցել մասնակցել առցանց հարթակում ընթացող քննարկումներին։ Ընդունված առաջարկությունները Հայաստանի, Արցախի և Սփյուռքի պետական մարմինների, հայկական կառույցների և կազմակերպությունների, գործարար շրջանակների սեփականությունն են:
Գործընթացի վերջին փուլը իրագործումն է: Դրանք իրագործելու նպատակով և վերը նշված երկու փուլերի հետ զուգահեռ «ԱՊԱԳԱ ՀԱՅԿԱԿԱՆԸ» նախաձեռնությունը անելու է ամեն ինչ, որպեսզի ձևավորվի Համագործակցային ցանց՝ ներգրավելով հայկական կառույցներին, մասնավոր ոլորտի ներկայացուցիչներին և հասարակական կազմակերպություններին, միջազգային գործընկերներին, բարեգործական կազմակերպություններին և անհատներին՝ միասնական ջանքերով կյանքի կոչելու Համաժողովի մասնակիցների ընդունած առաջարկները:
«ԱՊԱԳԱ ՀԱՅԿԱԿԱՆԸ» նախաձեռնության նպատակն է խթանել համահայկական երկխոսություն և համախմբել համազգային ներուժը՝ հայ ժողովրդի առջև ծառացած խնդիրների կայուն լուծումներ գտնելու համար: Հենց այդ նպատակով առաջադրվել է վերոնշյալ երեք փուլերից բաղկացած մոդելը: Որպես մոդելի առաջին կիրառման փորձ՝ մայիսի 22-ին անցկացվել է Ապագա Հայկականի Արցախյան ֆորումը՝ «Բնակչության աճն Արցախում» թեմայի շուրջ:
Մեր տեսլականը Հայաստանի առավել լավ ապագան է, որը կերտում ենք այսօր և միասին։
