Հայաստան-Սփյուռք միասնականություն փորձագիտական հանձնախումբ

Հակոբ Ասատրյանը հայ լրագրող է և հայ-չեխական համայնքի ականավոր հասարակական գործիչ։ 1999թ.-ին Պրահայում նա համահիմնադրել է «Օրեր» հայկական եվրոպական ամսագիրը և եղել է գլխավոր խմբագիրն իր հիմնադրման օրվանից: 1991թ.-ից եղել է «Ազգ» օրաթերթի քաղաքական վերլուծաբանը, իսկ 1998թ.-ից՝ Պրահայի թերթի թղթակիցը։ 1993-1997թթ.-ին պարոն Ասատրյանը եղել է Փարիզի «Les Nouvelles d'Armenie» ամսագրի թղթակից և Երևանյան գրասենյակի ղեկավարը, ինչպես նաև Ազատ Եվրոպա/Ազատություն ռադիոկայանի ռուսական ծառայության երևանյան թղթակիցը։ 1997-1998թթ.-ին եղել է Հայաստանում «Զանգվածային լրատվամիջոցները Անդրկովկասում» շվեյցարական ծրագրի համակարգողը։ 2009թ.-ին նա վեց ամիս աշխատել է նորաստեղծ Հայաստանի սփյուռքի նախարարությունում՝ որպես Եվրոպայի հայկական համայնքների և լրատվամիջոցների հարցերով փորձագետ-խորհրդատու՝ նշանակվելով և ընտրվելով ՄԱԿ-ի զարգացման ծրագրի կողմից: 2015թ.-ից իրականացնում է «Եվրոպայի հայկական համայնքներ» նախագիծը՝ «Օրեր» ամսագրում հրատարակելով հետազոտական հոդվածներ Եվրոպայում հայերի պատմության, ներկայի և ապագայի վերաբերյալ։ Վերջին 25 տարիների ընթացքում նա ակտիվորեն մասնակցել է Չեխիայի հայ համայնքի, ինչպես նաև Եվրոպայի տարբեր հայկական կազմակերպությունների գործունեությանը: Պարոն Ասատրյանը «Հայերը Չեխիայում և Սլովակիայում» գրքի համահեղինակ է և արժանացել է բազմաթիվ մրցանակների իր ստեղծագործությունների և հրապարակումների համար։ 1996թ.-ից Երևանի մամուլի ակումբի և Հայաստանի ժուռնալիստների միության անդամ է։

Լևոն Աֆեյանը հայազգի արդյունաբերական ձեռնարկատեր է Կանադայում։ Նա ծնվել է Լիբանանում և տեղափոխվել է Կանադա 15 տարեկանում: Նա Seatply Products Inc-ի հիմնադիրն ու գործադիր տնօրենն է: Որպես Մոնրեալի հայ համայնքի ակտիվ անդամ՝ նա անամակցել է բազմաթիվ հայկական կազմակերպությունների խորհուրդներում։ Նա նաև եղել է FCCQ-ի (Քվեբեկի առևտրային պալատների դաշնության) ակտիվ անդամ և եղել է Ձեռնարկատիրության և նորարարության հանձնաժողովի, ինչպես նաև Արտադրության և արտահանման հանձնախմբի կազմում: 2022 թվականին պարոն Աֆեյանը Հայաստանի Հանրապետության կողմից նշանակվել է իր պատվավոր հյուպատոս Քվեբեկ նահանգում։

Արտյոմ Գեղամյանը իրավաբանական գիտությունների թեկնածու է և ԱՄՆ Հարվարդի համալսարանի Ջոն Քենեդու անվան կառավարման դպրոցի շրջանավարտ, ՀՀ արդարադատության նախարարի նախկին տեղակալ։ Մասնագիտական գործունեությունը սկսել է 2001թ.` որպես տնտեսական գործերով վերաքննիչ դատարանի նախագահի օգնական: Աշխատել է ՀՀ արդարադատության նախարարությունում` որպես Մարդու իրավունքների եվրոպական դատարանի հետ կապերի վարչության պետ, դասավանդել է ԵՊՀ Իրավագիտության ֆակուլտետում և ՀՀ պետական կառավարման ակադեմիայում: Ներկայումս աշխատում է Եվրոպայի Խորհրդի Մարդու իրավունքների և իրավական պետության գլխավոր տնօրինությունում:

Ալեքսանդր Վ. Գևորկյանը տնտեսագիտության դոկտոր և դոցենտ է Նյու Յորքի Սեյնթ Ջոնս համալսարանի Փիթեր Թոբինի բիզնես քոլեջի տնտեսագիտության և ֆինանսի բաժնում և զբաղեցնում է Հենրի Ջորջի պատվավոր ակադեմիական պաշտոնը: Պրն. Գևորկյանի հետազոտությունը վերաբերում է բաց տնտեսության, մակրոտնտեսական զարգացման, սփյուռքի ուսումնասիրության և հետսոցիալիստական անցումային տնտեսության հարցերին։ Նա Սեյնթ Ջոնս համալսարանի Վինսենթյան կենտրոնի ավագ գիտաշխատող է, անդամակցում է Հայկական Տնտեսագիտական Միության խորհրդին և ծառայում է որպես ՄԱԿ-ում Սուրբ Աթոռի տնտեսագիտության հարցերով մշտական դիտորդական առաքելության փորձագետ: Պրն. Գևորկյանը մի շարք տնտեսագիտական հանդեսների խմագրական խորհուրդների անդամ է: Նա հեղինակել է «Անցումային տնտեսություններ. փոխակերպումը, զարգացումը և հասարակությունը Արևելյան Եվրոպայում և նախկին Խորհրդային Միությունում» և խմբագրել վերջերս հրատարակված «Փոխանակման սահմանափակումներ և զարգացող տնտեսություններ» գրքերը:

Նիկոլաս Դավիդյանը Բաց համալսարանի (Մեծ Բրիտանիա) հետազոտող է և ներկայումս Գյուլբենկյան հիմնադրամի աջակցությամբ սոցիոլոգիական հետազոտություններ է իրականացնում սփյուռքի մի շարք համայնքներում: ԵՄ շահերի պաշտպանության, քաղաքացիական հասարակության ղեկավարության և բնապահպանական խորհրդատվության ոլորտում աշխատելուց հետո նա ղեկավարել է ՀԲԸՄ Եվրոպայի աշխատանքը և 2012-2020թթ.-ին ղեկավարել է նրա եվրոպական գրասենյակը, ապա 2021-2022թթ.-ին ծառայել է որպես Հայաստանի Հանրապետության սփյուռքի հարցերով գերագույն հանձնակատարի խորհրդական: Պարոն Դավիդյանը գործադրել է մեծ ջանքեր հայկական սփյուռքի նորովի վերաիմաստավորման և Հայաստան-Սփյուռք կապերի ամրապնդման ուղղությամբ:

Սիրանուշ Դվոյանը բանասիրական գիտությունների թեկնածու է, դոցենտ: Դասավանդում է Հայաստանի ամերիկյան համալսարանում: 2011-ից համախմբագիրն է www.arteria.am մշակութային քննադատական կայքի: Տիկին Դվոյանը համակարգում է Հումանիտար հետազոտությունների հայկական կենտրոնի գիտական ծրագրերը, մասնակցում է Աշոտ Հովհաննիսյանի անվան հումանիտար հետազոտությունների ինստիտուտի խորհրդին որպես անդամ: Ժամանակակից սփյուռքահայ և արևմտահայ մի շարք հեղինակների խմբագիրն ու կազմողն է: Հեղինակ է մոտ երկու տասնյակ գիտական հոդվածների` տպագրված հայալեզու և միջազգային մամուլում ու հանդեսներում: Գիտական հետաքրքրությունները ներառում են հանրային կյանքի և անձնական փորձառության փոխակերպումներում խոսքային պրակտիկաների, հանրության արդիացման պրոցեսների արտիկուլացիաների, խոսքի ազատականացման և սրան հարող պրակտիկաների ուսումնասիրությունը: Վերջին տարիներին զբաղվում է պետական բռնության, մասնավորաբար խորհրդային Գուլագի ու վերջինիս գեղարվեստական վերարտադրության հարցերով:

Տիգրանե Եկաւեանը ֆրանսահայ լրագրող է, էսսեիստ և արևելյան ուսումնասիրությունների մասնագետ: Նա «DIASPORALOGUE» համահեղինակն է, «Հայաստանի աշխարհաքաղաքականություն» գրքի և շատ այլ հրատարակությունների հեղինակը:

Արման Եղիազարյանը պատմական գիտությունների դոկտոր, պրոֆեսոր է: Պարոն Եղիազարյանը դասախոսել է սփյուռքագիտության ամբիոնում և ղեկավարել ամբիոնը 2013֊2022 թվականներին, այժմ "Սփյուռքագիտություն" մագիստրոսական ծրագրի ղեկավարն է: Ունի աշխատանքային փորձառություն Երևանի Պետական Համալսարանում, ՀՀ ԱԳՆ Սփյուռքի հետ կապերի պետական կոմիտեում, ՀՀ սփյուռքի նախարարության աշխատակազմում: Պարոն Եղիազարյանը դասախոս է սփյուռքագիտության ամբիոնում և ղեկավարում է ամբիոնը 2013 թվականից: Հեղինակել է «Սմբատ Բ Տիեզերակալ թագավոր Հայոց», «Աշոտ Գ Ողորմած: Թագավոր հայոց», «Հայրենիք-սփյուռք հարաբերությունները արդի փուլում» աշխատությունները, համահեղինակել է «Հայրենիք-Սփյուռք հարաբերությունները. 1918 թվականից մինչև մեր օրերը» և շատ այլ աշխատանքներ և հոդվածներ:

Արտյոմ (Արտեմ) Երկանյանը Բազմափորձ լրագրող, քաղաքական մեկնաբան և հաղորդավար է: Կրթությունը ստացել է Վ. Բրյուսովի անվան պետական լեզվաբանական ինստիտուտի ռուսաց լեզվի և գրականության ֆակուլտետում: 1988-1998թթ.-ին թղթակցել և խմբագրել է բազմաթիվ թերթեր և ամսագրեր՝ «Կոմսոմոլ», «Գործարար աշխարհ», «Հայկական բորսայի տեղեկագիր», «Ժամանակ», «Հայաստանի Հանրապետություն», «Բրավո», «Բորսային լուրեր», «Նոր սերունդ», 1990թ.-ից՝ Հայաստանի Ժուռնալիստների միության: 1995թ.-ից Երևանի մամուլի ակումբի անդամ է։ 2002թ.-ից թղթակցում է «Կոմերսանտ» թերթին, իսկ 2003թ.-ից հանդիսանում է «Շանթ» հեռուստաընկերության լրատվական ծառայության խմբագիրը։ Պրն. Երկանյանը 2009 թ․-ին արժանացել է Երևանի Մամուլի ակումբի, 2010թ.-ին` Ռուսալեզու հեռուստատեսային և ռադիոհաղորդումների միջազգային 5-րդ փառատոնի մրցանակներին։ 2011թ.-ին հեղինակել է «Շանթ» հեռուստաընկերության «Աշխարհի հայերը» հաղորդաշարը:

Վահան Զանոյանը հեղինակ է, հանրային մեկնաբան, տնտեսագետ, համաշխարհային էներգետիկայի և ազգային անվտանգության խորհրդատու և թրաֆիքինգի դեմ պայքարի ջատագով։ Նա խորհրդատվություն է տվել աշխարհի բազմաթիվ կառավարությունների ազգային անվտանգության և տնտեսական ու էներգետիկ քաղաքականության հարցերում: Հրատարակել է երկու հատոր բանաստեղծություն հայերեն և չորս վեպ՝ անգլերեն։

Խաչիկ Թէօլէօլեանը հայ սփյուռքագետ, գրականագետ և հրապարակախոս է։ Լինելով Բրաունի համալսարանի դոկտոր՝ նա մասնագիացվել և զբաղվում է համեմատական գրականության, սփյուռքի և էթնիկ հարցերով: Ավարտել է Հարվարդի և Ռոդ Այլենդի համալսարանները։ 1981 թվականից աշխատում է Ուեսլեյան համալսարանում` հումանիտար գիտելիքների կենտրոնի փոխտնօրեն, տնօրեն, ապա՝ անգլերենի բաժնի տնօրեն, պրոֆեսոր։ 1991 թվականից նա «Սփյուռք. Անդրազգային հետազոտությունների պարբերաթերթի» (անգլերեն) հիմնադիր-խմբագիրն է, Զորյան ինստիտուտի տնօրենների խորհրդի անդամ։ Նրա ուսումնասիրություններն ընդգրկում են գրականագիտական, հասարակագիտական և պատմագիտական հարցեր։ Պրն. Թէօլէօլեանը հեղինակ է «Սփյուռքի մեջ» գրքի և բազմաթիվ հրապարակախոսությունների։

Սևան Կաբակյանը օդատիեզերական ինժեներ է և ունի նույն բնագավառում Հարավային Կալիֆոռնիայի համալսարանի մագիստրոսի կոչում: 2006թ.-ին Հայաստան տեղափոխվելուց ի վեր նա աշխատում է որպես Birthright Armenia-ի (Դեպի Հայք) բարեգործական հիմնադրամի տարածաշրջանային տնօրեն: Նախքան Հայաստան տեղափոխվելը, Կաբակյանը ավելի քան երկու տասնամյակ աշխատել է Լոս Անջելեսի հայ երիտասարդների հետ՝ օգտագործելով կամավորության, ուսման, բնության և թատրոնի տարրերը:

Վահագն Մելիքյանը ականավոր և բազմափորձ դիվանագետ է: Ավարտելով ԵՊՀ արևելագիտական ֆակուլտետի արաբական բաժինը՝ 1993թ. հաճախել է Եգիպտոսի դիվանագիտական ակադեմիայի հատուկ դասընթացների: 1991-2014թթ.-ին զբաղեցրել է բազմաթիվ պաշտոններ՝ այդ թվում ՀՀ ԱԳ նախարարի օգնականի, ՀՀ ԱԳՆ քարտուղարության պետի, ՀՀ պետական արարողակարգի ծառայության ղեկավարի, Արաբական Միացյալ Էմիրություններում, Քուվեյթում, Բահրեյնում, Կատարում, Արգենտինայում, Չիլիում, Պարագվայում, Ուրուգվայում ՀՀ արտակարգ և լիազոր դեսպանների, ՀՀ սփյուռքի նախարարի տեղակալի, ՀՀ ԱԳՆ գլխավոր քարտուղարի և մի շարք այլ պաշտոններ։ Ունի արտակարգ և լիազոր դեսպանի դիվանագիտական աստիճան:

Ատոմ Մխիթարյանը ֆիզմաթ. գիտությունների թեկնածու և Բարձրագույն կրթության և գիտության կառավարման ոլորտի փորձագետ է, ունի իրավագիտության մագիստրոսի աստիճան: 2008 թ. աշխատել է ՀՀ կրթության և գիտության նախարարության գիտության պետական կոմիտեում որպես բաժնի պետ, 2010-ից՝ ՀՀ սփյուռքի նախարարությունում որպես վարչության պետ: 2013 թ. ավարտել է Ջոն Սմիթի միջազգային քաղաքագիտական դասընթացը Մեծ Բրիտանիայում: 2014-2018 թթ. եղել է ՀՀ ԿԳՆ Բարձրագույն որակավորման հանձնաժողովի գործակալության պետի տեղակալը: Պրն Մխիթարյանը դասավանդում է ՀՀ ԳԱԱ Գիտակրթական միջազգային կենտրոնում:

Վազգեն Յակուբյանը սիրիական խոշորգույն շինարարական ընկերություններից մեկի՝ LAYC-ի տնօրենն է 1985թ.-ից, որը հիմնադրվել է Սիրիայում 1923թ. որպես ընտանեկան բիզնես: Նա ճարտարագիտության բակալավրի կոչում է ստացել Ուրբանա-Շամպեյգի Իլինոյս համալսարանից: Նա Puzant & Leon Yacoubian Trading and Contracting (Սիրիա) ընկերության գործընկերն է և գլխավոր տեխնիկական տնօրենը: 2012թ.-ից պարոն Յակուբյանը Leon A. Yacoubian Contracting LLC-ի (LAYC, Հայաստան) հիմնադիր և գործադիր տնօրեն է: 2006թ.-ից ՀԲԸՄ Կենտրոնական վարչության անդամ և Մերձավոր Արևելքի համակարգողն է Սիրիայի, Եգիպտոսի, Լիբանանի, Իրաքի, Իրանի և Կիպրոսի ուղղություններով, իսկ 2015թ.-ից ՀԲԸՄ Հայաստանի նախագահն է: 2010-2014թթ.-ին եղել է Հայ Առաքելական Եկեղեցու Դամասկոսի թեմի հանրային ժողովի ատենապետ։ 2015թ.-ից «Այբ» դպրոցի հոգաբարձուների խորհրդի անդամ է։ Նա նաև Հայաստանի ամերիկյան համալսարանի հոգաբարձուների խորհրդի, Հայոց ցեղասպանության թանգարան-ինստիտուտի հիմնադրամի, «Սիթի օֆ Սմայլ» բարեգործական հիմնադրամի և «Բիբլոս Բանկ Արմենիայի» անդամ է:

Սարգիս Շահինյանը ճարտարապետ է Ցյուրիխի տեխնիկական բարձրագույն դպրոցի կրթությամբ: 2001թ.-ից նա Շվեյցարիայի կառավարությունում տեխնիկական թարգմանիչն է։ Պրն. Շահինյանը «Շվեյցարիա-Հայաստան» խորհրդարանական բարեկամության խմբի համահիմնադիր և գլխավոր քարտուղարն է: Նա Շվեյցարիա-Հայաստան Առևտրի պալատի հիմնադիր փոխնախագահն է, ինչպես նաև Շվեյցարիա-Հայաստան ասոցիացիայի համահեղինակ և պատվավոր նախագահ: 2006թ. հոկտեմբերին պարոն Շահինյանը գլխավորել է խորհրդարանական բարեկամության խումբը, որը Փարիզում ՅՈՒՆԵՍԿՕ-ի գլխավոր տնօրենի հետ հանդիպման ընթացքում դատապարտե է ադրբեջանական բանակի կողմից Նախիջևանում (Ադրբեջան) Ջուղայի 3000 խաչքարերի ոչնչացումը: 2008 թվականին նա եղել է Ջերմուկում կառավարական Master Plan Project-ի մեկնարկի նախաձեռնողը: Պարոն Շահինյանը հեղինակել է բազմաթիվ հոդվածներ, ծավալել է բազմաբնույթ հասարակական և մանկավարժական գործունեություն՝ ուղղված հայության պատմության իրազեկմանը և Հայոց ցեղասպանության ժխտման դեմ պայքարին։ Նրա մասնագիտական հետաքրքրությունները նաև ներառում են քաղաքաշինության պատմության, հուշարձանների և տեսարժան վայրերի պահպանության վերաբերյալ մի շարք հարցեր:

Լիլիթ Շաքարյանը սոցիոլոգ է, դասախոս։ 2001-2007թթ. ստացել է բակալավրի և մագիստրոսի կոչում ԵՊՀ սոցիոլոգիայի ֆակուլտետում: 2013-2015թթ.-ին նա մասնակցել է մի շարք դասընթացների, վերապատրաստումների և հետազոտությունների՝ ներառյալ դասընթացներ Արիզոնայի պետական համալսարանում և հետազոտություն Ֆրիբուրգի համալսարանում: 2018-2021թթ.-ին աշխատել է Skill.am-ում՝ որպես մարզիչ։ 2019-2020թթ.-ին տիկին Շաքարյանը եղել է Իջևանի գինու-կոնյակի գործարան ՓԲԸ-ի հասարակայնության հետ կապերի և շուկայավարման բաժնի ղեկավար: 2019-2022թթ.-ին աշխատել է տարբեր ընկերություններում՝ որպես դասընթացավար, փորձագետ և հետազոտող։ 2009-2023թթ.-ին եղել է ԵՊՀ սոցիոլոգիայի ամբիոնի դասախոս: 2023թ.-ից ասպիրանտ, դասախոս և գիտաշխատող է Նևադայի համալսարանում:

Յովէլ Շնորհօքեանը ձեռնարկատեր է, գրող և ակտիվիստ: Նա DiasporArm համահայկական հարթակի հիմնադիրն է, որը նպատակի ունի ձևավորել Սփյուռքի համայնքների, ասոցիացիաների և առևտևային կազմակերպությունների միջև ամուր կապեր և հարաբերություններ։ Ծնված լինելով Լիբանանում ժամացույցների արտադրությամբ զբաղվող ընտանիքում՝ պարոն Շնորհօքեանը 1975թ. հաստատվել է Փարիզում և համահիմնել Ֆրանսիայում ժամացույցների մատակարարման ամենամեծ ընկերություններից մեկը: Լինելով ոչ ստանդարտ մտածողության տեր անձնավորություն և գյուտարար՝ նա մի շարք ոճային և նորարական լուծումներ է առաջարկել ժամացույցների, կենցաղային իրերի և ինտերիերի դիզայնի համար: Հեղինակել է մի քանի արտոնագրեր:

Աշոտ Ոսկանյանը հայ փիլիսոփա և դիվանագետ է, ունի փիլիսոփայական գիտությունների դոկտորի կոչում և դոցենտի աստիճան։ 1993-ին հիմնադրել է Հումանիտար հետազոտությունների հայկական կենտրոնը, որի նախագահն է մինչ այսօր: 1990-1995 թթ. եղել է առաջին անկախ խորհրդարանի՝ ՀՀ Գերագույն խորհրդի պատգամավոր, մշտական հանձնաժողովի նախագահ և Նախագահության անդամ: Հետագայում՝ ՀՀ Ազգային ժողովի պատգամավոր, ինչպես նաև ՀՀ Սահմանադրական հանձնաժողովի անդամ և Ազգային Եկեղեցական ժողովի պատվիրակ։ Պրն Ոսկանյանը 1995-2002 թթ. ՀՀ դեսպանն էր մի շարք եվրոպական երկրներում, այդ թվում՝ Ավստրիայում և Գերմանիայում: Եղել է ՀՀ մշտական ներկայացուցիչը ԵԱՀԿ-ում և ՄԱԿ-ի Վիեննայում տեղակայված կազմակերպություններում, ինչպես նաև մի շարք պաշտոններ է զբաղեցրել ՀՀ ԱԳՆ-ում: Հեղինակել է ավելի քան 50 գիտական՝ հայերեն, ռուսերեն, գերմաներեն, անգլերեն և ֆրանսերեն հրապարակումներ

Վահե Սահակյանը պատմական սոցիոլոգ է և Միչիգանի համալսարան-Դիրբորն հայկական հետազոտական կենտրոնի գիտաշխատող։ Նա սոցիոլոգիական գիտությունների թեկնածուի կոչում է ստացել Երևանի պետական համալսարանում և դոկտորի կոչում՝ Միչիգանի համալսարանում: 2001-2008թթ. դասավանդել է Երևանի պետական համալսարանի սոցիոլոգիայի բաժնում, իսկ 2010-2017թթ. ՝ Միչիգանի համալսարանի Մերձավոր Արևելքի ուսումնասիրությունների բաժնում: Վերջին տասնամյակի ընթացքում նա Հայկական Սփյուռքի վերաբերյալ բազմաբնույթ փորձարարական ուսումնասիրություններ է անցկացրել նախ դոկտորական հետազոտությունների շրջանակում, իսկ ավելի ուշ՝ որպես Հայկական սփյուռքի հետազոտության ակադեմիական խորհրդատվական խորհրդի անդամ: Պրն. Սահակյանի գիտական հետաքրքրությունները ներառում են բնակչության տեղաշարժերի, ազգայնականության, անդրազգայնականության և սփյուռքերի հետազոտությունների վերաբերյալ մի շարք հարցեր: 2022թ. նա կազմել և խմբագրել է ԵՊՀ հրատարակչության կողմից հրատարակված «Սփյուռքագիտություն. Քննական անտոլոգիա» հատորը, որը միավորում է հայտնի արևմտյան գիտնականների սփյուռքագիտության 19 հիմնարար հոդվածների և գրքերի հայերեն թարգմանությունները:

Արա Սանճեանը պատմական գիտությունների դոկտոր է, դոցենտ և Միչիգան-Դիրբորնի համալսարանի Հայկական հետազոտական կենտրոնի տնօրենը: Ծնվել է Բեյրութում և դպրոցական կրթությունն ստացել է այնտեղ։ 1986-1991թթ.-ին սովորել է Երևանի պետական համալսարանի Պատմության մագիստրատուրայում։ 1991-1994թթ.-ին նա Լոնդոնի համալսարանի Արևելյան և աֆրիկյան հետազոտությունների դպրոցում ստացել է դոկտորի աստիճան Մերձավոր Արևելքի ժամանակակից պատմության ատենախոսական թեմայով: 1996-2005թթ.-ին եղել է Բեյրութի Հայկազյան համալսարանի հայագիտության, պատմության և քաղաքագիտության բաժնի նախագահ: 2003թ.-ի աշնանը եղել է «Henry S. Khanzadian Kazan»-ի հրավիրյալ պրոֆեսոր Ֆրեզնոյում գտնվող Կալիֆոռնիայի պետական ​​համալսարանում: Նա միացել է Միչիգան-Դիրբորնի համալսարանին 2006թ. հունվարին: Պրն Սանճեանի հետազոտական հետաքրքրությունները ներառում են Առաջին համաշխարհային պատերազմից հետո Հայաստանի, Թուրքիայի և Արևմտյան Ասիայի արաբական պետությունների պատմության թեմաները: Նա հեղինակել է «Թուրքիան և նրա արաբ հարևանները», «1953-1958թթ.. ուսումնասիրություն Բաղդադի պայմանագրի ծագման և ձախողման մասին (2001թ.)» աշխատությունները, ինչպես նաև երկու մենագրություններ, մի շարք գիտական հոդվածներ և գրքերի գլուխներ, որոնք հրատարակվել են անգլերեն, հայերեն, ռուսերեն և ֆրանսերեն լեզուներով:

Հովհաննես Սարգսյանը փիլիսոփայական գիտությունների թեկնածու է, դոցենտ: Աշխատել է ՀՀ ԳԱԱ Փիլիսոփայության և իրավունքի ինստիտուտում որպես գիտաշխատող և ներկայումս գլխավորում է Հայ-Ռուսական համալսարանի քաղաքագիտության ամբիոնը: Պրն Սարգսյանը ունի փիլիսոփայական և քաղաքագիտական դասընթացների դասավանդման հարուստ փորձ։ Նրա գիտական հետաքրքրությունների կենտրոնում են ազգային ինքնության, ազգակերտման, ազգային անվտանգության, ռազմավարական մշակույթների և այլ հիմնահարցեր։ Շուրջ յոթ տասնյակ գիտական հրապարակման հեղինակ է:

Աննա Հեսս Սարգսյանը Genesis Armenia-ի սփյուռքի ոլորտի ղեկավարն է։ Նա միջազգային հարաբերությունների մասնագետ է, անվտանգության և հակամարտությունների ուսումնասիրության փորձագետ, ինչպես նաև մասնագիտացած է խաղաղության միջնորդության և բանակցությունների ոլորտում: Ինչպես պետական, այնպես էլ մասնավոր ոլորտներում Սարգսյանը ղեկավարել է մի շարք ֆորմալ և ոչ ֆորմալ խաղաղության գործընթացներ և մշակել է կրթական ծրագրեր խաղաղության և հակամարտությունների ուսումնասիրության ոլորտում: Աննան մի շարք հրապարակումների հեղինակ է։ Նրա ընթացիկ հետազոտությունը նվիրված է աշխարհաքաղաքական լարվածության ազդեցության վրա երկարատև հակամարտությունների կարգավորմանը:

Արփի Վարդանյանը Ամերիկայի հայկական համագումարի տարածաշրջանային տնօրենն է: Նա ավարտել է Միչիգանի Ալբիոն համալսարանը՝ զուգահեռ իսպաներեն լեզվի ու տնտեսագիտություն և կառավարում ֆակուլտետները, բակալավրի աստիճանով: Նախքան մագիստրոսի կոչում ստանալը տիկին Վարդանյանն ապրել է Իտալիայում, ինչպես նաև Միչիգանում աշխատել է Ford Motor Company-ում: 1993թ. ավարտել է Միջազգային կառավարման ամերիկյան բարձրագույն դպրոցը (Ֆինեքս, Արիզոնա), որը հայտնի է նաև Тhunderbird անվանմամբ, միջազգային կառավարման մագիտրոսի որակավորմամբ: 1994-1995թթ. տիկին Վարդանյանն Ամերիկայի հայկական համագումարի (Համագումար) ծրագրի՝ հասարակական կազմակերպություների (ՀԿ) ուսուցման և տեղեկատվական կենտրոնի (ՀԿ կենտրոն) տնօրենն է եղել: 1996-1997թթ. Վարդանյանն աշխատել է Համագումարի վաշինգտոնյան գրասենյակում՝ լինելով և° քարոզչական գործերի, և° Թերջենյան-Թոմաս փորձնակնեերի ամառային ծրագրի պատասխանատուն: 2000 թ. Վարդանյանին վերադարձել է Վաշինգտոն՝ դառնալով Ամերիկայի հայկական համագումարի գործադիր տնօրեն: 2012թ. նա միացավ Հայկական բարեգործական ընդհանուր միությանը (ՀԲԸՄ)՝ գլխավորելու վերջինիս հայկական ներկայացուցչական գրասենյակը: 2015թ. տիկին Վարդանյանը վերստին միացավ Ամերիկայի հայկական համագումարին՝ որպես տարածաշրջանային տնօրեն:

Բաբկեն Տեր-Գրիգորյանը իրանահայ է և հայերանադարձ, ով մասնագիտացված է զարգացման տնտեսագիտությունում: Նա կրթությունը ստացել է Կալիֆոռնիայի համալսարանում և Լոնդոնի տնտեսագիտական դպրոցում: 2012թ․-ից հաստատվել է հայրենիքում, գրանցելով բազմաթիվ աշխատանքային հաջողություններ, համագործակցել է մի շարք միջազգային իրավապաշտպան կազմակերպությունների և զարգացման գործակալությունների հետ: 2018թ-ի փետրվարից եղել է ԼՂՀ մարդու իրավունքների պաշտպանի խորհրդական: 2018-2019թթ.-ին եղել ա ՀՀ Սփյուռքի փոխնախարար:

Արմեն Տեր-Կյուրեղյանը ծնունդով իրանահայ ամերիկահայ ակադեմիկոս է, Հայաստանի Ամերիկեան Համալսարանի հիմնադիրներից մեկը, որտեղ զբաղեցրել է նախագահի պաշտոնը 2014-2019 թվականներին: 1988թ. Սպիտակի ավերիչ երկրաշարժից հետո Տեր-Կյուրեղյանը մեծ ներդրում է ունեցել Հայաստանի Ամերիկյան Համալսարանը որպես Կալիֆոռնիայի համալսարանի մասնաճյուղ Երևանում հիմնադրելու գործում: Բերքլիում Կալիֆոռնիայի համալսարանի Քաղաքացիական ճարտարագիտության Թայսեի ամբիոնի պրոֆեսորի պաշտոնին զուգահեռ եղել է ՀԱՀ-ի Ճարտարագիտական ֆակուլտետի հիմնադիր դեկան (1991-2007), Ճարտարագիտական հետազոտական կենտրոնի տնօրեն (1991-2004) և ժամանակավոր պրովեստ (2011-2012): Տեր-Կյուրեղյանի ակադեմիական հետաքրքրություններն ընդգրկում են կառույցների հուսալիության, ռիսկերի վերլուծության, պատահական տատանումների և երկրաշարժի ճարտարագիտության թեմաները: Նա ստեղծել է համալիր կառույցների անվտանգության և հուսալիության գնահատման, ռիսկերի վերլուծության և որոշումների կայացման, ինչպես նաև շենքերի, կամուրջների և կրիտիկական սարքավորումների ստոխաստիկ սեյսմիկ վերլուծության մեթոդներ: Արմեն Տեր-Կյուրեղյանն ունի ավելի քան 300 հրապարակումներ, այդ թվում 130-ը արխիվային ամսագրերում։

Ռազմիկ Փանոսեանը կանադահայ պատմաբան և քաղաքագետ է։ Նա ստացել է մագիստրոսի կոչում Տորոնտոյի Յորքի համալսարանում, իսկ Բակալավրի կոչումը՝ Մոնրեալի ՄաքԳիլ համալսարանում: Դոկտոր Փանոսեանը պաշտպանել է իր ատենախոսությունը Լոնդոնի տնտեսագիտության և քաղաքական գիտությունների դպրոցում: Նրա թեզը արժանացել է Մեծ Բրիտանիայի Քաղաքական հետազոտությունների ասոցիացիայի կողմից շնորհվող հեղինակավոր Լորդ Բրայսի մրցանակին` Մեծ Բրիտանիայում Համեմատական և միջազգային քաղաքականության լավագույն ատենախոսության համար: Պրն. Փանոսեանը դասավանդել է Լոնդոնի տնտեսագիտության դպրոցում և արևելյան և աֆրիկյան հետազոտությունների դպրոցում ազգայնականության, էթնիկ հակամարտությունների, հետխորհրդային անցումային շրջանի, ժողովրդավարացման և համեմատական քաղաքականության թեմաներով: 2004 թվականին նա ստանձնել է Կանադայի դաշնային հաստատություն գտնվող Քաղաքականության, ծրագրերի և պլանավորման տնօրենի պաշտոնը Մարդու իրավունքների և ժողովրդավարական զարգացման միջազգային կենտրոնում, որը նվիրված է ժողովրդավարության և մարդու իրավունքների խթանմանը: 2010-2012թթ.-ին Փանոսեանն աշխատել է որպես միջազգային խորհրդատու, այդ թվում ՄԱԶԾ-ում (Նյու Յորք): 2013 թվականից դոկտոր Փանոսեանը Գալուստ Գյուլբենկյան հիմնադրամի հայկական համայնքների բաժնի տնօրենն է: Նա բազմաթիվ գրքերի և հոդվածների հեղինակ է։

Հակոբ Փանոսյանը ճարտարագիտության դոկտոր է, ինքնաշխատ և հրթիռային համակարգերի կառավարման բնագավառի գիտնական: Բակալավրի աստիճան ստացել է Բեյրութի Ամերիկյան համալսարանում, մագիստրոսի՝ Հարավային Կալիֆոռնիայի համալսարանում և դոկտորի աստիճան՝ Լոս Անջելեսի կալիֆոռնյան համալսարանում։ Եղել է Boeing-ի տեխնիկական անդամ (թոշակի անցած) և AIAA-ի անդամ: Նա ունի արտոնագրեր տատանումների կառավարման և հիդրավլիկ գործադիր մեխանիզմների տեխնիկական բնագավառներում և մի քանի մրցանակների է արժանացել իր նորարարությունների համար: Դոկտոր Փանոսյանը արժանացել է Rocketdyne-ի տարվա ինժեների և Նախագահի մրցանակի և Ամերիկայի հայ ճարտարագետների և գիտնականների (AESA) մրցանակների՝ 1983թ.-ից հիմնադրած կազմակերպության կողմից: Նա հեղինակ է ավելի քան 80 տեխնիկական հոդվածներ: Դոկտոր Փանոսյանը ԱՐՓԱ ինստիտուտի հիմնադիրն է և նրա նախագահն է հիմնադրման օրվանից՝ 1992թ.-ից: 1987թ.-ին նա ընտրվել է Furbright Exchange Scientists-ի անդամ և մեկ կիսամյակ անցկացրել Հայաստանում՝ դասավանդելով ՀԱՊՀ-ում և ԵՊՀ-ում: Դոկտոր Փանոսյանը ընտրվել է նաև Հայաստանի Գիտությունների ազգային ակադեմիայի սփյուռքի անդամ և ստացել է հռչակագրեր Լոս Անջելեսի քաղաքային խորհրդի և Կալիֆորնիայի Համագումարի կողմից, ինչպես նաև Հայ Եկեղեցու Արևմտյան թեմից՝ համայնքում ունեցած նշանակալի ավանդի համար: