Ապագա Հայկականի Համաժողովը հիմնված է միջազգային լայն ճանաչում և կիրառություն ունեցող «Քաղաքացիական ասամբլեա» մասնակցային ժողովրդավարության մոդելի վրա։ Նախապես գրանցված քաղաքացիներից թափանցիկ վիճակահանությամբ և ներկայացուցչական ընտրանքի մեթոդով կընտրվեն 200 մասնակիցներ՝ ապահովելով հասարակության սեռատարիքային ու կրթական խմբերի, ինչպես նաև ըստ բնակության երկրի և վայրի ներկայացվածությունը համաժողովում: Արդյունքում Հայրենիքից և Սփյուռքից ընտրված 100-ական մասնակիցներ հնարավորություն կունենան քննարկելու Հայաստանի ու հայության ապագային ուղղված և փորձագիտական գնահատում անցած ծրագրեր: Առաջին Համաժողովը նվիրված է լինելու «ԱՊԱԳԱ ՀԱՅԿԱԿԱՆԸ» նախաձեռնության 15 նպատակներից երեքին՝ «Պատմական պատասխանատվություն», «Հայաստան-Սփյուռք միասնականություն» և «Բնակչության աճ»:
Հայաստանի և հայության առջև ծառացած արդի մարտահրավերները հնարավոր է լուծել միմիայն ՀՀ-ի ու Սփյուռքի, ինչպես նաև ներհասարակական միասնականության ամրապնդման միջոցով: Համաժողովը հանդիսանալու է համահայկական երկխոսության հարթակ՝ մեկ հարկի տակ միավորելով փորձագիտական համայնքի ու հասարակության ամենատարբեր խմբերի ներուժը` արդյունքում նպաստելով ինչպես փորձագիտական, այնպես էլ հանրային ակտիվ քննարկումների իրականացմանը:
Համաժողովի մասնակցության գրանցումը բաց է լինելու Հայաստանից, Արցախից և Սփյուռքից բոլոր ցանկացողների համար: Չունենալով չափահաս քաղաքացիների մասնակցության համար որևէ սահմանափակում՝ Համաժողովն իր շուրջն է համախմբելու աշխարհասփյուռ հայության համամասնորեն արտահայտված սեռատարիքային, կրթական և աշխարհագրական բոլոր շերտերն ընդգրկող խմբերին: Համաժողովին գրանցված, սակայն վիճակահանության փուլը չհաղթահարած յուրաքանչյուր հետաքրքրված անձ հնարավորություն կունենա իր ձայնը լսելի դարձնելու նախատեսված այլ ձևաչափերով:
Համաժողովի ամբողջ ընթացքը՝ ներառյալ փորձագիտական հանձնախմբերի աշխատանքը, մասնակիցների ընտրության վիճակահանությունը, հանրային քննարկումներն ու համագործակցության ցանցերի ձևավորման գործընթացը, բաց է և հրապարակային: Շահագրգիռ բոլոր կողմերը հնարավորություն ունեն հետևելու այդ ամենին ինչպես մեր պաշտոնական կայքէջում, այնպես էլ սոցիալական հարթակներում ու լրատվական աղբյուրներում:
Համաժողովի շրջանակում ընդունված բոլոր առաջարկություններն ու ծրագրերը հանդիսանում են հանրային սեփականություն և հասանելի են պետական ու մասնավոր ոլորտի բոլոր ներկայացուցիչներին՝ դրանց հնարավոր տարբերակները մշակելու համար։ Որպես ուղիղ ժողովրդավարության ինքնատիպ գործիք՝ Համաժողովը փորձելու է ապահովել հանրության բոլոր բաղադրատարրերի ջանքերի մեկտեղման հնարավորությունը:
Մենք միասին ձևավորում ենք քաղաքացիական մասնակցության նոր մշակույթ, որի առանցքը երկխոսությունն է և հավաքական պատասխանատվության գիտակցումը։ Հայկական իրականության մեջ նմանը չունեցող Համաժողովն իր մոտեցումներով պետք է նպաստի պետության ու հասարակության համար կենսական նշանակություն ունեցող հարցերի շուրջ խոսույթի ձևավորմանը և խնդիրների հաղթահարման ուղիների մշակմանը:
Համաժողովին մասնակցության հայտը կարող եք ներկայացնել՝
Հաստատեք Ձեր էլ․ փոստի հասցեն և ստացեք հատուկ կոդը վիճակահանությանը մասնակցելու համար:
Բոլոր դիմորդներից ներկայացուցչական ընտրանքի մեթոդով կընտրվեն 200 մասնակից։
Համաժողովի մասնակիցները՝
«ԱՊԱԳԱ ՀԱՅԿԱԿԱՆԸ» զարգացման հիմնադրամը մայիսի 22-ին Ստեփանակերտում կազմակերպել է «Ապագա Հայկականի» Արցախյան ֆորումը՝ նվիրված Արցախում բնակչության աճի թեմային:
Արցախյան ֆորումին մասնակցել են «ԱՊԱԳԱ ՀԱՅԿԱԿԱՆԻ»՝ արցախյան հասարակության բոլոր շերտերը ներկայացնող ավելի քան վաթսուն նախաձեռնողներ:
